مشكلة الشباب الحبيبه مشكله عويصه ،مشكلتهم أنهم بيسرحوا بعقول بالبنات و يوعدوهم بالجواز و شويه شويه بيصدقوا نفسهم و تمر الأيام و الواد السيس لا جه و لا اتقدم و لا أتنيل ..الكلام ده في كل المستويات الاجتماعيه .. ساعات تبتدي البنت تفوق و تشوف الضرر اللي حصل و ده يتراوح من ألم نفسي بسيط ، مرورا بصرفها عليه لأن معظمهم سناكيح وصولاً إلي ما لا يحمد عقباه و ساعات تانيه مابتفوقش علشان هي مش عايزه تفوق و هنا الضرر حيحصل حيحصل . المهم الريحه بتطلع و الأهل بيعرفوا و بتحصل مصايب و أسهلها علقه سخنه و أصعبها موت الواد و ساعات البت ، لغاية هنا .. مفيش جديد ده حديث الصباح و المساء ، يعني عايز تقول أيه !!..لو الولد و البنت الاتنين مسلمين أو الاتنين مسيحين ،أحيانا كتيره و لا حتي بنسمع عن الموضوع أصلاً ، حتي لو فيها قتل .. الكارثه لو الولد مسيحي و البت مسلمه أو الولد مسلم و البت ميسيحه .. المصيبه تتحول إلي كارثه .. و قتل و دمار و كراهيه و احتقان و فتنه و الحقيقه مفيش غالب و لا مغلوب .. الكل مغلوب و ساعتها محدش حيقول الواقع الأقتصادي و كارثة العنوسه و المخدرات و الجهل و التربيه الخاطئه هما الأسباب التي تؤدي إلي الكوارث، ح يتقال مقصوده مقصوده مقصدوه
الرجاء من كل الشباب السيس خليكوا رجاله و شوية أخلاق ،أكنها أختك يا واد ، بس لو مصممين تفضلوا زباله ساعتها خليكوا طائفين، خلوها مصايب مش كوارث .. مصر مش مستحمله الصنف المضروب اللي بتتهببوا تتعاطوه ربنا يستر
